Negozioen eta inposizioen hezkuntza borrokatu!
Martxoaren 20an ikasle langileok grebara!
Datorren martxoaren 20an Ikasle Abertzaleak taldeko kideek ikasle greba deitu dute, negozioen eta inposizioen hezkuntza sistemaren aurka. Deialdian adierazten da hezkuntza-sistemaren egoerak okerrera egiten duela urtetik urtera, eta ados baino adosago gaude horrekin.
LOMCE-aren eraso zuzenaren ondoren, -haren ondoriorik kaltegarrienak geldiarazi genituen 30 ikasle-greba baino gehiagoren bidez (batzuk irakasleekin batera)-, hezkuntza-erreformak ez dute etenik izan. Erreforma horien guztien helburua argia izan da: hezkuntza publikoa prekarizatzen eta merkantilizatzen jarraitzea, suntsitu arte.
EAEren kasua muturrekoa da: itunpeko hezkuntza pribatuan matrikulatutako ikasleen ehuneko handiena duen Europako bigarren lurraldea da. Izan ere, EAJ ez da PPk eta PSOEk bultzatutako estatu-erreformen atzetik joan. EAEko Hezkuntza Lege berriak are gehiago sakontzen ditu hezkuntza publikoaren aurkako erasoak eta pribatizazioa.
Eskuinarentzat eta sozialdemokraziarentzat, Espainolarentzat eta Euskal Herrikoarentzat, ikasle-mugimendua da beren erasoen helburu nagusietako bat. Urteetan, gazteak mugimendu sozial indartsuen buruan egon gara. Orain, ahotsa altxatu eta mobilizatzean, gogor zapaltzera jotzen dute soinean borra eta plaka duten euren akolitoak erabiliz.
Ertzaintzak Gasteizko EHUko Herri Unibertsitatea orain gutxi indarrez hustu izana horren adibide garbia da. Dozenaka ertzain Letren Fakultatean modu basatian sartu ziren, gertatzen ari zen eserialdiaren kontra bortizki oldartu eta ikasleak identifikatzeari ekin zioten. (Gure elkartasun oharra)
Horrekin guztiarekin amaitzeko, bide bakarrak balio du: borrokak eta mobilizazio sendo eta bateratuenak.
Martxoaren 12an, gehiengo sindikalak greba deitu zuen sektore publikoan, eta izugarrizko arrakasta izan zuen. Hezkuntza-eredu pribatizatzaile horren aurkako ikasleen borroka eta zerbitzu publikoetako langileen borroka bateratzea ez da negatiboa, positiboa baizik. Ekintzak, lanuzteak eta grebak koordinatzea, erakundeen aniztasun politikoa errespetatuz, "bananduta joan eta elkarrekin kolpatu" da langileen eta gazteen batasuna helburu komunen arabera zehazteko modurik onena. Estrategia hori ez luke inongo erakunde iraultzailek baztertu behar.
Gure ustez, Ikasle Abertzaleak taldeak deitutako greba eta mobilizazioak garrantzitsuak izango dira ikasleak mobilizatzeko, hain zuzen, patronalen beharretara bideratzen den eta gazteen eskubide politiko eta demokratikoak gogor zapaltzen dituen hezkuntza sistemaren aurka. Horregatik, Ikasle Sindikatutik deialdi hau babesten dugu eta ikasle guztiak animatu nahi ditugu martxoaren 20an ikasgelak hustera eta kaleak betetzera.
Negozioen eta inposizioen hezkuntza borrokatu!
Martxoaren 20an ikasle langileok grebara!